ಇವರು ಪ್ರಸಿದ್ಧ ನಟ. ಅಭಿಮಾನಿಗಳು ಪ್ರೀತಿಯಿಂದ ದಾದಾಮುನಿ ಎಂದೇ ಕರೆಯುತ್ತಿದ್ದರು. ಅಕ್ಟೋಬರ್ 13, 1911 ರಲ್ಲಿ ಜನಿಸಿದ ಈ ಪ್ರಸಿದ್ಧ ನಟ ತಮ್ಮ ವೃತ್ತಿಜೀವನವನ್ನು ಹಿಮಾಂಶು ರಾಯ್ ಅವರ ಜೀವನ್ ನಯ್ಯಾ ಚಿತ್ರದೊಂದಿಗೆ ಪ್ರಾರಂಭಿಸಿದರು. ಈ ಚಿತ್ರ ಮಾಡುವಾಗ ನಟಿಯ ಕುತ್ತಿಗೆಗೆ ಸರ ಹಾಕಲು ಸಹ ಅವರು ತುಂಬಾ ಹೆದರುತ್ತಿದ್ದರು…ಅಷ್ಟೇ ಏಕೆ ಸೆಟ್‌ನಿಂದ ಓಡಿಹೋಗಿದ್ದರು. ತಮ್ಮ ಮೊದಲ ಚಿತ್ರದಲ್ಲೇ ಖಳನಾಯಕನ ಕಾಲು ಸಹ ಮುರಿದಿದ್ದರು. ಈ ಕುರಿತು ಹಿರಿಯ ಪತ್ರಕರ್ತ ಅನಂತ್ ವಿಜಯ್ ನಟನ ಕುರಿತು ಕೆಲವು ಆಸಕ್ತಿದಾಯಕ ಘಟನೆಗಳನ್ನು ಹಂಚಿಕೊಂಡಿರುವುದನ್ನು ನಾವು ನೋಡೋಣ ಬನ್ನಿ…
ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟ ಮೇಲೆ ಮೊದಲ ಸಂಬಂಧಕ್ಕೆ ಬಿತ್ತು ಬ್ರೇಕ್.ಪ್ರಥಮ ಚಿತ್ರದಲ್ಲೇ ಖಳನಾಯಕನ ಕಾಲು ಮುರಿದಿತ್ತು.ಅಮ್ಮ ಹಾಕಿದ್ದ ಆ ಎರಡು ಷರತ್ತುಗಳೇನು?ಬೆಳಗ್ಗೆ ಒಂಬತ್ತೂವರೆ ಗಂಟೆಯಾಗಿತ್ತು. ಬಾಂಬೆ ಟಾಕೀಸ್‌ನಲ್ಲಿ ಒಂದು ಚಿತ್ರದ ಚಿತ್ರೀಕರಣ ಪ್ರಾರಂಭವಾಗುವುದರಲ್ಲಿತ್ತು. ಬಾಂಬೆ ಟಾಕೀಸ್‌ನ ಮಾಲೀಕರಾದ ಹಿಮಾಂಶು ರೈ ತಮ್ಮ ಹೊಸ ಚಿತ್ರದಲ್ಲಿ ಹೊಸ ಹುಡುಗನನ್ನು ನಾಯಕನನ್ನಾಗಿ ಮಾಡಲು ನಿರ್ಧರಿಸಿದ್ದರು. ಆ ಚಿತ್ರದ ಹೆಸರು ‘ಜೀವನ್ ನಯ್ಯ’. ಮತ್ತೆ ಆ ಚಿತ್ರದಲ್ಲಿ ನಟಿಸುತ್ತಿರುವ ಯುವಕನೇ ಅನಂತ್ ವಿಜಯ್ ಅವರು ಹೇಳಿರುವ ಖ್ಯಾತ ನಾಯಕ ನಟ ಅಶೋಕ್ ಕುಮಾರ್. ಅಶೋಕ್ ಬೆಳಗ್ಗೆ ಚಿತ್ರೀಕರಣಕ್ಕಾಗಿ ಸೆಟ್ ತಲುಪಿದಾಗ, ಹಿಮಾಂಶು ರೈ ಅವರನ್ನು ನೋಡಿ ಶಾಕ್‌ ಆದರು. ಏಕೆಂದರೆ ಅಶೋಕ್ ಕುಮಾರ್ ಅವರ ಕೂದಲನ್ನು ಅವ್ಯವಸ್ಥಿತವಾಗಿ ಕತ್ತರಿಸಲಾಗಿತ್ತು.
ಆಗ ಹಿಮಾಂಶು ರೈ ಕೇಳಿದರು… “ಇದೇನು ಅಶೋಕ್?”, ತೊದಲುತ್ತಿದ್ದ ಅಶೋಕ್ ಏನನ್ನೋ ಹೇಳುವ ಮೊದಲೇ ಹಿಮಾಂಶು ರೈ ಕೇಶ ವಿನ್ಯಾಸಕನಿಗೆ ಕರೆ ಮಾಡಿ ಕೂದಲನ್ನು ಸರಿಪಡಿಸಲು ಹೇಳಿದರು. ಅಶೋಕ್ ಹಿಮಾಂಶು ರೈ ಅವರನ್ನು ಕರುಣಾಜನಕ ಮುಖಭಾವದಿಂದ ನೋಡಿ, “ಸರ್, ನಾನು ಒಂದು ವಿಷಯ ಹೇಳಬೇಕು” ಎಂದರು. ಹಿಮಾಂಶು ರೈ ಅವರ ಶೈಲಿಯಲ್ಲಿ ಹೇಳಿದರು “ಮಾತನಾಡಿ”. ಅಶೋಕ್ ಹಿಮಾಂಶು ರೈ ಅವರ ಕೈ ಹಿಡಿದು ಸೆಟ್‌ನ ಒಂದು ಮೂಲೆಗೆ ಕರೆದೊಯ್ದು ಮೆಲ್ಲನೆ ಹೇಳಿದರು, “ನೀವು ಕೇಳಿದರೆ ನಾನು ಚಿತ್ರದಲ್ಲಿ ಕೆಲಸ ಮಾಡುತ್ತೇನೆ, ಆದರೆ ದಯವಿಟ್ಟು ನಾಯಕಿಯನ್ನು ಅಪ್ಪಿಕೊಳ್ಳಲು ಹೇಳಬೇಡಿ. ನಾನು ಅದನ್ನು ಮಾಡಲು ಸಾಧ್ಯವಾಗುವುದಿಲ್ಲ” ಎಂದರು.
ಹಿಮಾಂಶು ರೈ ಕೇಳಿದರು..”ಏಕೆ”?. ಆಗ ಅಶೋಕ್ ಮೌನವಾದಾಗ “ಚಿತ್ರದಲ್ಲಿ ಅಂತಹ ಯಾವುದೇ ದೃಶ್ಯ ಇರುವುದಿಲ್ಲ” ಎಂದು ಹಿಮಾಂಶು ಅವರಿಗೆ ಭರವಸೆ ನೀಡಿದರು. ಅದಾದ ನಂತರ ಮೇಕಪ್ ಆರ್ಟಿಸ್ಟ್ ಅಶೋಕ್ ಜೊತೆ ಹೊರಟುಹೋದರು. ಮೇಕಪ್ ಮತ್ತು ಗೆಟಪ್ ಸರಿಪಡಿಸಿಕೊಂಡ ನಂತರ ಅಶೋಕ್ ಸೆಟ್ ತಲುಪಿದಾಗ, ಅವರು ಮತ್ತೆ ಶಾಕ್‌ ಆದರು. ಏಕೆಂದರೆ ಅವರ ಮುಂದೆ ದೇವಿಕಾ ರಾಣಿ ಇದ್ದರು. ಅವರೊಂದಿಗೆ ಅಶೋಕ್ ತನ್ನ ಮೊದಲ ಶಾಟ್ ಮಾಡಬೇಕಾಗಿತ್ತು.
ನಿರ್ದೇಶಕರು ಅಶೋಕ್‌ಗೆ ದೃಶ್ಯವನ್ನು ವಿವರಿಸಿದರು. ಅಶೋಕ್ ಆತಂಕಕ್ಕೊಳಗಾಗುತ್ತಿದ್ದರು. ಹಿಮಾಂಶು ರೈ ಹತ್ತಿರ ಬಂದು, ಅಶೋಕ್ ಭುಜದ ಮೇಲೆ ಕೈಯಿಟ್ಟು, “ಒಬ್ಬ ಹುಡುಗ ತನ್ನ ಗೆಳತಿಗೆ ಚಿನ್ನದ ಸರ ತಂದು ಅವಳ ಕುತ್ತಿಗೆಗೆ ಹಾಕುವುದು ತುಂಬಾ ಸಾಮಾನ್ಯವಾದ ವಿಷಯ. ನೀವು ಮಾಡಬೇಕಾಗಿರುವುದು ಇಷ್ಟೇ” ಎಂದು ಹೇಳಿದರು. ಅಶೋಕ್ ಕುಮಾರ್ ಕೈಯಲ್ಲಿ ಚಿನ್ನದ ಸರದೊಂದಿಗೆ ದೇವಿಕಾ ರಾಣಿ ಬಳಿ ಹೋಗುತ್ತಾರೆ. ನಾಯಕಿಯ ಹತ್ತಿರ ಹೋದ ತಕ್ಷಣ ಅವರಿಗೆ ಭಯ ಹುಟ್ಟಿ ಬಾತ್ರೂಮ್ ಕಡೆಗೆ ಓಡುತ್ತಾರೆ. ಸ್ವಲ್ಪ ಸಮಯದ ನಂತರ ಬಂದ ಮೇಲೆ ಚಿತ್ರೀಕರಣ ಪ್ರಾರಂಭವಾಗುತ್ತದೆ.
ಅಶೋಕ್ ನಡುಗುವ ಕೈಗಳಿಂದ ದೇವಿಕಾ ರಾಣಿಯ ಕುತ್ತಿಗೆಗೆ ಸರ ಹಾಕಲು ಪ್ರಯತ್ನಿಸುತ್ತಾರೆ. ಸರ ಆಕೆಯ ಕೂದಲಿನಲ್ಲಿ ಸಿಕ್ಕಿಹಾಕಿಕೊಳ್ಳುತ್ತದೆ. ಮತ್ತೆ ಪ್ರಯತ್ನಿಸಲು ಕೇಳಲಾಗುತ್ತದೆ. ಈ ಬಾರಿ ನಿರ್ದೇಶಕರು ಚಿತ್ರೀಕರಣ ನಿಲ್ಲಿಸುವುದಿಲ್ಲ ಮತ್ತು ಅಶೋಕ್ ಕುಮಾರ್ ಅವರಿಗೆ ಸರವನ್ನು ಹಾಕಲು ಹೇಳುತ್ತಾರೆ. ಅಶೋಕ್ ಕುಮಾರ್ ಎಷ್ಟು ಬಲವಾಗಿ ಸರವನ್ನು ಹಾಕಲು ಪ್ರಯತ್ನಿಸಿದರೆಂದರೆ ದೇವಿಕಾ ರಾಣಿಯ ಕೂದಲು ಸಡಿಲವಾಯಿತು.
ವಾಸ್ತವವಾಗಿ ಅಶೋಕ್ ಕುಮಾರ್ ಎರಡು ವಿಷಯಗಳ ಬಗ್ಗೆ ತೀವ್ರವಾಗಿ ಚಿಂತಿತರಾಗಿದ್ದರು. ಮೊದಲನೆಯದಾಗಿ, ಅವರ ಬಾಸ್‌ನ ಹೆಂಡತಿ ಅಲ್ಲಿ ನಟಿಯಾಗಿದ್ದರು, ಎರಡನೆಯದಾಗಿ, ಅವರ ತಾಯಿ ಚಲನಚಿತ್ರಗಳಲ್ಲಿ ಕೆಲಸ ಮಾಡಲು ಹೋಗುತ್ತಿದ್ದರೂ ಹುಡುಗಿಯರಿಂದ ದೂರವಿರಬೇಕೆಂದು ಹೇಳಿದ್ದರು. ಅಂತಿಮವಾಗಿ ಈ ದೃಶ್ಯವನ್ನು ನಂತರ ಚಿತ್ರೀಕರಿಸಲು ನಿರ್ಧರಿಸಲಾಯಿತು. ಎರಡನೇ ದೃಶ್ಯ ಹೇಗಿತ್ತೆಂದರೆ, ಚಿತ್ರದ ಖಳನಾಯಕನು ನಟಿಯನ್ನು ಕೀಟಲೆ ಮಾಡಲು ಪ್ರಯತ್ನಿಸುತ್ತಿದ್ದ. ಅಶೋಕ್ ಕುಮಾರ್ ಅವರನ್ನು ತಳ್ಳಿ ಬೀಳಿಸಬೇಕು.
ನಿರ್ದೇಶಕರು ಅವರಿಗೆ ದೃಶ್ಯವನ್ನು ವಿವರಿಸಿದರು. ಹತ್ತರವರೆಗೆ ಎಣಿಸಿ, ಹತ್ತು ಪೂರ್ಣಗೊಂಡ ತಕ್ಷಣ ತಳ್ಳುತ್ತೇನೆ ಎಂದು ಹೇಳಿದರು. ಶಾಟ್ ಆರಂಭವಾಯಿತು. ನಿರ್ದೇಶಕರು ಎಣಿಸಲು ಪ್ರಾರಂಭಿಸಿದರು. ಗಾಬರಿಗೊಂಡ ಅಶೋಕ್ ಕುಮಾರ್ ಟೇಕ್ ಮುಗಿಯುವವರೆಗೂ ಕಾಯದೆ ಖಳನಾಯಕನನ್ನು ತಳ್ಳಿದರು. ಆ ತಳ್ಳುವಿಕೆ ಎಷ್ಟು ಜೋರಾಗಿತ್ತೆಂದರೆ, ದೇವಿಕಾ ರಾಣಿ ಮತ್ತು ಖಳನಾಯಕ ಇಬ್ಬರೂ ದಡಬಡ ಸದ್ದಿನೊಂದಿಗೆ ನೆಲದ ಮೇಲೆ ಬಿದ್ದರು. ಖಳನಾಯಕನ ಕಾಲು ಮುರಿದಿತ್ತು. ದೇವಿಕಾ ರಾಣಿ ನಗುತ್ತಾ ಎದ್ದು ನಿಂತರು. ಆ ದಿನ ಚಿತ್ರೀಕರಣ ನಿಲ್ಲಿಸಬೇಕಾಯಿತು.
ಹೀಗೆ ಅಶೋಕ್ ಕುಮಾರ್ ಅವರ ಜೀವನದ ಕಥೆ ತುಂಬಾ ಆಸಕ್ತಿದಾಯಕವಾಗಿದೆ. ಅವರ ತಾಯಿಯ ಮನೆ ಬಿಹಾರದ ಭಾಗಲ್ಪುರದಲ್ಲಿತ್ತು. ತಾಯಿ ಅವರಿಗೆ ಮದುವೆ ನಿಶ್ಚಯಿಸಿದ್ದರು. ಅಶೋಕ್ ಕುಮಾರ್ ಸಿನಿಮಾಗಳಲ್ಲಿ ಕೆಲಸ ಮಾಡಲಿದ್ದಾರೆಂದು ಹುಡುಗಿಯ ತಂದೆಗೆ ತಿಳಿದಾಗ ಈ ಸಂಬಂಧ ಮುರಿದುಬಿತ್ತು. 1934ರಲ್ಲಿ, ಅಶೋಕ್ ಕುಮಾರ್ ಹಿಮಾಂಶು ರೈ ಅವರ ಕಂಪನಿ ಬಾಂಬೆ ಟಾಕೀಸಿನಲ್ಲಿ ಕೆಲಸ ಮಾಡಲು ಪ್ರಾರಂಭಿಸಿದರು. ಆದರೆ ಹಿಮಾಂಶು ರೈ ಅವರನ್ನು ನಟನನ್ನಾಗಿ ಮಾಡಿದರು. ಮತ್ತೊಂದೆಡೆ, ಅಶೋಕ್ ಕುಮಾರ್ ಅವರ ತಾಯಿಗೆ ತನ್ನ ಮಗ ಸಿನಿಮಾಗಳಲ್ಲಿ ಕೆಲಸ ಮಾಡಲಿದ್ದಾನೆಂದು ತಿಳಿದಾಗ, ಸಿನಿಮಾ ಹುಡುಗಿಯರಿಂದ ದೂರವಿರಲು ಸಲಹೆ ನೀಡಿದರು. 1938 ರ ಹೊತ್ತಿಗೆ, ಅಶೋಕ್ ಕುಮಾರ್ ಅವರ ಆರು ಚಲನಚಿತ್ರಗಳು ಬಿಡುಗಡೆಯಾಗಿದ್ದವು.
ಅವರು ‘ಅಚ್ಚುತ್ ಕನ್ಯಾ’ ಚಿತ್ರದಿಂದ ಖ್ಯಾತಿಯನ್ನು ಗಳಿಸಿದ್ದರು. ಮತ್ತೊಂದೆಡೆ, ಅವರ ತಾಯಿಗೆ ಮಗನ ಮದುವೆಯ ಬಗ್ಗೆ ಚಿಂತೆ ಶುರುವಾಯಿತು. 1938 ಏಪ್ರಿಲ್ ನಲ್ಲಿ, ಮುಂಬೈನಲ್ಲಿರುವ ಅಶೋಕ್ ಕುಮಾರ್ ಅವರಿಗೆ ಅವರ ತಂದೆಯಿಂದ ಟೆಲಿಗ್ರಾಮ್ ಬಂದಿತು. ಅದರಲ್ಲಿ “ಖಾಂಡ್ವಾಗೆ ಬೇಗನೆ ಬಾ” ಎಂದು ಬರೆಯಲಾಗಿತ್ತು. ಆ ಸಮಯದಲ್ಲಿ ಅಶೋಕ್ ಕುಮಾರ್ ‘ವಚನ್’ ಚಿತ್ರದ ಚಿತ್ರೀಕರಣದಲ್ಲಿದ್ದರು. ಅವರು ತಕ್ಷಣ ನಿರ್ದೇಶಕ ಮತ್ತು ನಿರ್ಮಾಪಕರೊಂದಿಗೆ ಮಾತನಾಡಿ ಖಾಂಡ್ವಾಗೆ ಹೊರಟರು. ರೈಲು ಖಾಂಡ್ವಾ ತಲುಪಿತು.
ಅಶೋಕ್ ಕುಮಾರ್ ರೈಲಿನಿಂದ ಇಳಿಯುತ್ತಿದ್ದಂತೆ ತಂದೆ ರೈಲಿನೊಳಗೆ ಬರುತ್ತಿರುವುದನ್ನು ನೋಡಿದರು. ತಂದೆ ಬಂದ ಕೂಡಲೇ, “ರೈಲಿನಿಂದ ಇಳಿಯುವ ಅಗತ್ಯವಿಲ್ಲ, ಮುಂದೆ ಕಲ್ಕತ್ತಾ (ಈಗ ಕೋಲ್ಕತ್ತಾ)ಗೆ ಹೋಗಬೇಕು” ಎಂದು ಹೇಳಿದರು. ಅವರಿಗೆ ತನ್ನ ತಂದೆಯನ್ನು ಕೇಳುವ ಧೈರ್ಯವಿರಲಿಲ್ಲ. ಮಹಿಳಾ ಕಂಪಾರ್ಟ್‌ಮೆಂಟ್‌ಗೆ ಹೋಗಿ ಭಾಭಿಯನ್ನು ಭೇಟಿಯಾಗಲು ತಂದೆ ಹೇಳಿದ್ದರು. ಭಾಭಿಯನ್ನು ಭೇಟಿಯಾದಾಗ “ನಾವು ಕಲ್ಕತ್ತಾಗೆ ಏಕೆ ಹೋಗುತ್ತಿದ್ದೇವೆ” ಎಂದು ಅಶೋಕ್ ಕುಮಾರ್ ಕೇಳಿದರು. ಭಾಭಿ ಚೇಷ್ಟೆಯ ನಗುವಿನೊಂದಿಗೆ ” ನಾವು ನಿನ್ನ ಮದುವೆಗೆ ಕಲ್ಕತ್ತಾಗೆ ಹೋಗುತ್ತಿದ್ದೇವೆ.” ಎಂದು ಹೇಳಿದರು ಅಶೋಕ್ ಜೋರಾಗಿ ನಕ್ಕು ತಮ್ಮ ಕಂಪಾರ್ಟ್‌ಮೆಂಟ್‌ಗೆ ಹಿಂತಿರುಗಿದರು. ಅಶೋಕ್ ಕಲ್ಕತ್ತಾ ತಲುಪಿದಾಗ, ತಾಯಿ ಮತ್ತು ಇತರ ಸಂಬಂಧಿಕರು ಅಲ್ಲಿಗೆ ಬಂದಿದ್ದರು. ಹೀಗೆ ನಾಟಕೀಯ ಘಟನೆಗಳ ನಡುವೆ, ಅಶೋಕ್ ಕುಮಾರ್ ಮದುವೆಯಾದರು.
ಆ ದಿನ ಏಪ್ರಿಲ್ 14, 1938 ಮತ್ತು ಅಶೋಕ್ ಕುಮಾರ್ ಅವರ ಪತ್ನಿಯ ಹೆಸರು ಶೋಭಾ. ಅಶೋಕ್ ಕುಮಾರ್ ಮದುವೆಯಾದ ನಂತರ ಮುಂಬೈಗೆ (ಆಗ ಬಾಂಬೆ) ಮರಳಿದರು. ಮದುವೆಯ ನಂತರ, ಅಶೋಕ್ ಕುಮಾರ್ ಅವರ ಖ್ಯಾತಿ ಮತ್ತು ಆದಾಯ ಎರಡೂ ಹೆಚ್ಚಾಯಿತು. ಅಶೋಕ್ ಕುಮಾರ್ ಅವರ ತಾಯಿಗೆ, ಸಿನಿಮಾಗಳಲ್ಲಿ ಕೆಲಸ ಮಾಡಿದರೂ ತನ್ನ ಮಗ ದಾರಿ ತಪ್ಪುವುದಿಲ್ಲ ಎಂದು ಸಮಾಧಾನವಾಯಿತು.
