ಲಡ್ಡು ವಿವಾದದ ನಡುವೆಯೇ ಚರ್ಚೆಯಾಗುತ್ತಿರುವ ವಿಷಯ ತಿರುಪತಿ ದೇವಸ್ಥಾನದ ನಾಲ್ಕು ಅರ್ಚಕ ಕುಟುಂಬಗಳು: ಇಲ್ಲಿದೆ ಇವರ ವೇತನ, ಸೌಲಭ್ಯಗಳ ವಿವರ  

Tirupati balaji temple: ಆಂಧ್ರಪ್ರದೇಶದ ತಿರುಪತಿ ಬಾಲಾಜಿ ದೇವಸ್ಥಾನದ ನೈವೇದ್ಯದಲ್ಲಿ ಪ್ರಾಣಿಗಳ ಕೊಬ್ಬು ಇದೆ ಎಂಬ ಆರೋಪದ ಮೇಲೆ ದೇಶಾದ್ಯಂತ ಸಂಚಲನ ಉಂಟಾಗಿದೆ. ತಿರುಪತಿಯಲ್ಲಿ ಲಡ್ಡುಗಳಲ್ಲಿ ಕಲಬೆರಕೆ ಆರೋಪ ಕೇಳಿಬಂದ ಹಿನ್ನೆಲೆಯಲ್ಲಿ ತಿರುಮಲ ತಿರುಪತಿ ದೇವಸ್ಥಾನಕ್ಕೆ ಗುಣಮಟ್ಟವಿಲ್ಲದ ತುಪ್ಪ ಪೂರೈಸಿದ ತಮಿಳುನಾಡು ಮೂಲದ ಕಂಪನಿಗೆ ಎಫ್‌ಎಸ್‌ಎಸ್‌ಎಐ ಶೋಕಾಸ್ ನೋಟಿಸ್ ಜಾರಿ ಮಾಡಿದೆ.

ಲಡ್ಡು ವಿವಾದದ ನಡುವೆಯೇ, ತಿರುಪತಿ ದೇವಸ್ಥಾನದ ಸೇವೆಯಲ್ಲಿ ತೊಡಗಿರುವ ನಾಲ್ಕು ಕುಟುಂಬಗಳ ಬಗ್ಗೆ ಇತ್ತೀಚಿನ ದಿನಗಳಲ್ಲಿ ಸಾಕಷ್ಟು ಚರ್ಚೆಯಾಗುತ್ತಿದೆ, ಅವರ ವಂಶಸ್ಥರು ಶತ ಶತಮಾನಗಳಿಂದ ದೇವಸ್ಥಾನವನ್ನು ನೋಡಿಕೊಳ್ಳುತ್ತಿದ್ದು, ಈ ಕುಟುಂಬದ ಶಕ್ತಿಯು ಯಾವುದೇ ಸಾಮಾನ್ಯ ಕುಟುಂಬಕ್ಕಿಂತ ಹೆಚ್ಚು ಎನ್ನಲಾಗಿದೆ.

ಆ ನಾಲ್ಕು ಕುಟುಂಬಗಳು ಯಾವುವು?

ಈ ಮೊದಲೇ ಹೇಳಿದ ಹಾಗೆ ತಿರುಮಲ ತಿರುಪತಿ ಬಾಲಾಜಿ ದೇವಸ್ಥಾನದ ಧಾರ್ಮಿಕ ನಿರ್ವಹಣೆಯನ್ನು ಶತ ಶತಮಾನಗಳಿಂದ ನಾಲ್ಕು ಪ್ರಬಲ ಪುರೋಹಿತರ ಕುಟುಂಬಗಳು ನಡೆಸಿಕೊಂಡು ಬರುತ್ತಿವೆ. ದೇವಸ್ಥಾನದಲ್ಲಿ ಮುಂಜಾನೆಯಿಂದ ಸಂಜೆಯವರೆಗೆ ನಡೆಯುವ ಧಾರ್ಮಿಕ ವಿಧಿ ವಿಧಾನಗಳನ್ನು ಈ ಕುಟುಂಬದವರು ನಡೆಸುತ್ತಾರೆ. ದೇವಾಲಯವು ಒಟ್ಟು 58 ಅರ್ಚಕರನ್ನು ಹೊಂದಿದ್ದರೂ, ಈ ನಾಲ್ಕು ಶ್ರೀಮಂತ ಕುಟುಂಬಗಳಿಂದ 23 ಅರ್ಚಕರನ್ನು ಸಂಪ್ರದಾಯದಂತೆ ನೇಮಿಸಲಾಗಿದೆ. ಈ ನಾಲ್ಕು ಕುಟುಂಬಗಳ ಹೆಸರು ಪೈಡಿಪಲ್ಲಿ, ಗೊಲ್ಲಪಲ್ಲಿ, ಪೆದ್ದಿಂತಿ ಮತ್ತು ತಿರುಪತಮ್ಮ. ಇವರು ತಿರುಮಲದ ಶ್ರೀ ವೆಂಕಟೇಶ್ವರ ಸ್ವಾಮಿ ದೇವಸ್ಥಾನದಲ್ಲಿ ತಲೆಮಾರುಗಳಿಂದ ಆಚರಣೆಗಳನ್ನು ನಡೆಸುತ್ತಾ ಬಂದಿದ್ದಾರೆ. ದೇವಾಲಯದ ಮೊದಲ ಅರ್ಚಕರಾದ ಗೋಪಿನಾಥಾಚಾರ್ಯರು ಇವರ ವಂಶಸ್ಥರು.

ವೇತನ ಮತ್ತು ಸೌಲಭ್ಯಗಳ ವಿವರ

ತಿರುಮಲ ತಿರುಪತಿ ದೇವಸ್ಥಾನಂ ಟ್ರಸ್ಟ್ ಎಲ್ಲಾ ರೀತಿಯ ಕೆಲಸಗಳಿಗಾಗಿ ಒಟ್ಟು 16,000 ಜನರನ್ನು ಹೊಂದಿದೆ. ದೇವಸ್ಥಾನದಲ್ಲಿ ವಂಶಪಾರಂಪರ್ಯವಲ್ಲದ 35 ಅರ್ಚಕರಿದ್ದಾರೆ. ಪ್ರಧಾನ ಅರ್ಚಕರು ಎಂದು ಕರೆಯಲ್ಪಡುವ ದೇವಾಲಯದ ಮುಖ್ಯ ಅರ್ಚಕರನ್ನು ಅನುವಂಶಿಕವಾಗಿ ನೇಮಿಸಲಾಗುತ್ತದೆ. ಪ್ರಸ್ತುತ ಪ್ರಧಾನ ಅರ್ಚಕರಾದ ಎ ವೇಣುಗೋಪಾಲ್ ದೀಕ್ಷಿತುಲು ಅವರಿಗೆ  ಹೆಚ್ಚುವರಿ ಸೌಲಭ್ಯಗಳೊಂದಿಗೆ ಮಾಸಿಕ ವೇತನ ಸುಮಾರು 82,000 ರೂ. ಮತ್ತೋರ್ವ ಹಿರಿಯ ಅರ್ಚಕರನ್ನು ಸಹ ಅನುವಂಶಿಕವಾಗಿ ನೇಮಿಸಲಾಗುತ್ತದೆ. ಇವರಿಗೆ ಪ್ರತಿ ತಿಂಗಳು 52,000 ರೂ. ನಿಖರವಾದ ಮೊತ್ತವನ್ನು ಬಹಿರಂಗಪಡಿಸದಿದ್ದರೂ ಅವರು ಪ್ರತ್ಯೇಕ ಭತ್ಯೆಗಳನ್ನು ಸಹ ಪಡೆಯುತ್ತಾರೆ.

ಅನುವಂಶೀಯವಲ್ಲದ ಅರ್ಚಕರ ವೇತನ ಅನುಭವಕ್ಕೆ ಅನುಗುಣವಾಗಿ 30,000 ರೂ.ನಿಂದ 60,000 ರೂ.  ಎಲ್ಲಾ ಪುರೋಹಿತರಿಗೆ ವಾಸಿಸಲು ಮನೆಗಳನ್ನು ಒದಗಿಸಲಾಗಿದೆ. ಅರ್ಚಕರು ತಮ್ಮ ಸಂಬಳದ ಜೊತೆಗೆ ವಿವಿಧ ರೀತಿಯ ಭತ್ಯೆಗಳನ್ನು ಸಹ ಪಡೆಯುತ್ತಾರೆ. ಈ ಭತ್ಯೆಗಳ ಬಗ್ಗೆ ನಿರ್ದಿಷ್ಟ ವಿವರಗಳು ಲಭ್ಯವಿಲ್ಲ. ಎಲ್ಲಾ ಅರ್ಚಕರು ಮತ್ತು ಅವರ ಕುಟುಂಬಗಳ ಆರೋಗ್ಯ ವೆಚ್ಚವನ್ನು ಟಿಟಿಡಿ ಭರಿಸುತ್ತದೆ. ಇದು ತನ್ನದೇ ಆದ ಅತ್ಯಾಧುನಿಕ ಆಸ್ಪತ್ರೆಯನ್ನು ಸಹ ನಿರ್ವಹಿಸುತ್ತದೆ. ಅನುವಂಶಿಕ ಅರ್ಚಕರಿಗೆ ಸಂಬಳದ ಹೊರತಾಗಿ ಅವರ ಸೇವೆಗೆ ದೊಡ್ಡ ಮೊತ್ತವನ್ನು ನೀಡಲಾಗುತ್ತದೆ.

ಪುರೋಹಿತರು ನಿವೃತ್ತರಾಗುತ್ತಾರೆಯೇ?

ಸರ್ಕಾರಿ ನೌಕರರಂತೆ ಅರ್ಚಕರಿಗೂ ನಿವೃತ್ತಿ ವಯಸ್ಸು 65 ವರ್ಷ. ಆದರೆ ನಿವೃತ್ತಿಯ ವಿಷಯವು ಇನ್ನೂ ನ್ಯಾಯಾಲಯದಲ್ಲಿದೆ, ಪ್ರತಿ ಅರ್ಚಕರು ವಿಐಪಿ ಪಾಸ್ ಸೌಲಭ್ಯವನ್ನು ಹೊಂದಿದ್ದು, ಇದರ ಅಡಿಯಲ್ಲಿ ಅವರು ತಮ್ಮ ಕುಟುಂಬಕ್ಕೆ ಅಥವಾ ದೇವಸ್ಥಾನದಲ್ಲಿರುವ ಇತರ ಜನರಿಗೆ ವಿಐಪಿ ದರ್ಶನವನ್ನು ನೀಡಬಹುದು. ಪ್ರತಿ ಅರ್ಚಕರು ದರ್ಶನಕ್ಕಾಗಿ ಎರಡು ವಿಐಪಿ ಪಾಸ್‌ಗಳನ್ನು ಪಡೆಯುತ್ತಾರೆ.