Motivational Story: ಅದೆಷ್ಟೋ ಮಂದಿ ಸರ್ಕಾರಿ ನೌಕರಿ ಸೇರುವ ಕನಸು ಕಾಣುತ್ತಿರುತ್ತಾರೆ. ಆದರೆ ಕೆಲವರು ಮಾತ್ರ ಅದೇ ಸರ್ಕಾರಿ ಕೆಲಸ ತೊರೆದು ಅಥವಾ ಸರ್ಕಾರಿ ಕೆಲಸ ಸಿಕ್ಕರೂ ಹೋಗದೆ ಸ್ವಂತ ಉದ್ಯಮ ಆರಂಭಿಸಿ ತಾವು ಬೆಳೆದು ಇತರರನ್ನು ಬೆಳೆಸಿ ಸ್ಫೂರ್ತಿಯಾಗುತ್ತಾರೆ. ಆದರೆ ಇದೆಲ್ಲಾ ಸಿನಿಮಾ, ಕಥೆ, ಕಾದಂಬರಿಗಳಲ್ಲಿ ಕೇಳುವುದಕ್ಕೆ ಚೆನ್ನ, ರಿಯಲ್‌ ಲೈಫ್‌ನಲ್ಲಿ ಆಗದ ಮಾತು ಬಿಡಿ ಎನ್ನುವವರಿಗೆ ಹೀಗೂ ಮಾಡಲು ಸಾಧ್ಯ ಎಂದು ತೋರಿಸಿಕೊಟ್ಟಿದ್ದಾರೆ ಡಾ ಕಾಮಿನಿ.
ಎಲ್ಲಾ ಸಾವಯವ
ಡಾ. ಕಾಮಿನಿ ಸಾವಯವ ನುಗ್ಗೇಕಾಯಿ (Drumstick) ಕೃಷಿ ಮಾಡುವ ಮೂಲಕ ತಮ್ಮದೇ ಆದೆ ಗುರುತನ್ನು ಗಳಿಸಿಕೊಂಡಿದ್ದಾರೆ. ಮೊರಿಂಗಾ ಎಂದೂ ಕರೆಯಲ್ಪಡುವ ನುಗ್ಗೇಕಾಯಿ ಪೌಷ್ಠಿಕಾಂಶ ಮತ್ತು ಔಷಧೀಯ ಗುಣಗಳಿಂದ ಸಮೃದ್ಧವಾಗಿದೆ. ಇದನ್ನು ಸಾಂಬಾರ್, ಕರಿ, ಚಹಾ ಮತ್ತು ಇತರ ಉತ್ಪನ್ನಗಳಲ್ಲಿ ಬಳಸಲಾಗುತ್ತದೆ. ಅಂದಹಾಗೆ ಕಾಮಿನಿ ನುಗ್ಗೇಕಾಯಿಯಿಂದ ಸಾಬೂನು, ಎಣ್ಣೆ, ಸೊಳ್ಳೆ ನಿವಾರಕ ಸ್ಪ್ರೇ, ಮೊರಿಂಗಾ ಪುಡಿ ಮತ್ತು ಕ್ಯಾಪ್ಸುಲ್‌ಗಳಂತಹ ಅನೇಕ ಉತ್ಪನ್ನಗಳನ್ನು ತಯಾರಿಸಲು ಪ್ರಾರಂಭಿಸಿದರು. ಅವರ ಎಲ್ಲಾ ಉತ್ಪನ್ನಗಳು ಸಾವಯವವಾಗಿರುವುದು ವಿಶೇಷವಾಗಿದೆ.
ವಿಜ್ಞಾನಿಯಿಂದ ಉದ್ಯಮಿ
ಡಾ. ಕಾಮಿನಿ ಅವರು ಲಕ್ನೋದ CISH (ಸೆಂಟ್ರಲ್ ಇನ್ ಸ್ಟಿಟ್ಯೂಟ್ ಫಾರ್ ಸಬ್ಟ್ರೋಪಿಕಲ್ ಹಾರ್ಟಿಕಲ್ಚರ್)ನಲ್ಲಿ ವಿಜ್ಞಾನಿಯಾಗಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು. 7 ವರ್ಷ ಸರ್ಕಾರಿ ಕೆಲಸ ಮಾಡಿದ ನಂತರ ಸಾವಯವ ಕೃಷಿಯತ್ತ ಒಲವು ಹೆಚ್ಚಾಯಿತು. ಆದ್ದರಿಂದ ಅವರು 2015 ರಲ್ಲಿ ತಮ್ಮ ಕೆಲಸಕ್ಕೆ ರಾಜೀನಾಮೆ ನೀಡಿದರು. ಮೊರಿಂಗಾದಲ್ಲಿ ಸಂಶೋಧನೆ ಪ್ರಾರಂಭಿಸಿದರು. ಈ ಸಮಯದಲ್ಲಿ ಅವರು ಕೃಷಿ ಕಂಪನಿಯಲ್ಲಿ ಯೋಜನಾ ನಿರ್ದೇಶಕರಾಗಿ ಕೆಲಸ ಮಾಡಿದರು. ಅಲ್ಲಿ ರೈತರೊಂದಿಗೆ ಸಂಪರ್ಕ ಸಾಧಿಸಲು ಅವಕಾಶ ಸಿಕ್ಕಿತು. ಆ ನಂತರ ಮೊರಿಂಗಾ ಕೃಷಿಯನ್ನು ಪ್ರಾರಂಭಿಸುವ ದೃಢ ನಿರ್ಧಾರವನ್ನು ತೆಗೆದುಕೊಂಡೆ ಎಂದು ಕಾಮಿನಿ ಅವರು ತಿಳಿಸಿದ್ದಾರೆ.
2017 ರಲ್ಲಿ ಪ್ರಾರಂಭ
2017 ರಲ್ಲಿ ಡಾ.ಕಾಮಿನಿ ರೈತರ ಸಹಯೋಗದೊಂದಿಗೆ ಮೊರಿಂಗಾ ಕೃಷಿಯ ಪ್ರಾಯೋಗಿಕ ಯೋಜನೆಯನ್ನು ಪ್ರಾರಂಭಿಸಿದರು. ಇದನ್ನು ಪ್ರತಿ ಋತುವಿನಲ್ಲಿಯೂ ಬೆಳೆಯಬಹುದು ಮತ್ತು ಯಾವುದೇ ರಾಸಾಯನಿಗಳ ಅಗತ್ಯವಿಲ್ಲದ ಕಾರಣ ಮೊರಿಂಗಾ ಕೃಷಿ ಆಯ್ಕೆ ಮಾಡಿಕೊಂಡರಂತೆ ಕಾಮಿನಿ. ಅಷ್ಟೇ ಅಲ್ಲ, ಮೊರಿಂಗಾದ ಎಲೆಗಳು, ಬೇರುಗಳು ಮತ್ತು ಹಣ್ಣುಗಳಲ್ಲಿ ಜೀವಸತ್ವಗಳು ಮತ್ತು ಖನಿಜಗಳು ಹೆಚ್ಚಿನ ಪ್ರಮಾಣದಲ್ಲಿ ಕಂಡುಬರುತ್ತವೆ.
ವ್ಯಾಪಾರಕ್ಕೆ ಸಿಕ್ಕ ಮನ್ನಣೆ
ಕಾಮಿನಿ 2019 ರಲ್ಲಿ ತನ್ನ ಸಂಸ್ಥೆಯ ಅಡಿಪಾಯವನ್ನು ಹಾಕಿದರು ಮತ್ತು ದೊಡ್ಡ ಪ್ರಮಾಣದಲ್ಲಿ ಕೆಲಸ ಮಾಡಲು ಪ್ರಾರಂಭಿಸಿದರು. ಮೊರಿಂಗಾ ಪುಡಿ, ಸಾಬೂನು, ಎಣ್ಣೆ ಮತ್ತು ಕ್ಯಾಪ್ಸುಲ್‌ಗಳಂತಹ ಉತ್ಪನ್ನಗಳನ್ನು ಉತ್ಪಾದಿಸಲು ರೈತರೊಂದಿಗೆ ಪಾಲುದಾರಿಕೆಯಲ್ಲಿ ಕೆಲಸ ಮಾಡಿದರು. ಆರಂಭದಲ್ಲಿ ಅವರು ಸ್ಥಳೀಯ ಮಾರುಕಟ್ಟೆಯಲ್ಲಿ ಪೌಚ್‌ ಪ್ಯಾಕಿಂಗ್‌ನಲ್ಲಿ ಪುಡಿಯನ್ನು ಮಾರಾಟ ಮಾಡುತ್ತಿದ್ದರು. ನಂತರ ಅವರು IIT (BHU) ನ ಅಗ್ರಿ-ಬ್ಯುಸಿನೆಸ್ ಇನ್ಕ್ಯುಬೇಟರ್ ಸಹಾಯ ಪಡೆದರು. ಇಲ್ಲಿ ಅವರು 25 ಲಕ್ಷ ರೂ. ಬೆಲೆಯ ಯಂತ್ರವನ್ನು ತೈಲವನ್ನು ಹೊರತೆಗೆಯಲು ಮತ್ತು ಕ್ಯಾಪ್ಸುಲ್ ತುಂಬಲು ಖರೀದಿಸಿದರು. ಇದರಿಂದ ಅವರ ಉತ್ಪಾದನೆ ಹೆಚ್ಚಾಯಿತು.
ಕೋಟಿಗಟ್ಟಲೇ ವ್ಯಾಪಾರ
ಡಾ. ಕಾಮಿನಿ ಈಗ 50 ರಿಂದ 100 ರೈತರೊಂದಿಗೆ ಕೆಲಸ ಮಾಡುತ್ತಿದ್ದಾರೆ. ಅವರು ಮೊರಿಂಗಾ ಬೆಳೆಯಲು ತರಬೇತಿ ನೀಡುವುದಲ್ಲದೆ, ಅವರ ಬೆಳೆಯನ್ನು ಖರೀದಿಸುತ್ತಾರೆ. ಇದರಿಂದ ರೈತರಿಗೆ ಉತ್ತಮ ಆದಾಯವೂ ದೊರೆಯುತ್ತಿದೆ. ಇಂದು ಅವರ ವಾರ್ಷಿಕ ಆದಾಯವು ಸುಮಾರು 1.75 ಕೋಟಿ ರೂ.ಗಳಾಗಿದ್ದು, 2025 ರ ಆರ್ಥಿಕ ವರ್ಷದ ವೇಳೆಗೆ 2.50 ಕೋಟಿ ರೂ. ಪಡೆಯುವ ಗುರಿಯನ್ನು ಹೊಂದಿದ್ದಾರೆ. ಅವರ ಉತ್ಪನ್ನಗಳು ಆನ್‌ಲೈನ್ ಪ್ಲಾಟ್‌ಫಾರ್ಮ್ಗಳಲ್ಲಿಯೂ ಲಭ್ಯವಿದೆ. ಇದರಿಂದಾಗಿ ದೇಶಾದ್ಯಂತ ಅವರ ಉತ್ಪನ್ನಗಳ ಮಾರಾಟ ಸುಲಭವಾಗಿದೆ.
